ინტერვიუ ვანესა ონგთან

პირადად მე ვაგროვებ ძველ Celine-ის ნივთებს, Phoebe Philo-ს პერიოდიდან. მათ, როგორც წესი Vestaire-ზე ან The Real Real-ზე ვპოულობ.

ვანესა რომელ წელს აღმოვაჩინე არ მახსოვს. მგონი, მაშინ ტერმინი ინფლუენსერი არ იხმარებოდა და ინსტაგრამის გარდა ის ონლაინ ბლოგს (Haute Pursuit) უძღვებოდა. ვანესას საიტი ლამაზ look-ებს, ნიუ იორკულ ცხოვრების წესსა და სამაგალითო ბლოგინგს აერთიანებდა. ის ერთ-ერთია იმ მცირერიცხოვან ბლოგერების შორის, რომლებმაც მოდის ინდუსტრიაში ახალი ნიშა შექმნეს და თანამედროვე ინფლუენსერებს გაუკვალეს გზა. ვანესა სისტემატიურად თანამშრომლობს ისეთ ბრენდებთან როგორებიცაა Chanel, Bottega Veneta, PRADA და პარალელურად უძღვება პოდქასტების სერიებს სახელად VanessaWantsToKnow.
ვანესა წარსულშიც გამხდარა ჩემი ბლოგის ინსპირაცია, დღეს კი შესაძლებლობა მაქვს ის ჩემი ინტერვიუს მეშვეობით უფრო ახლოს გაგაცნოთ.

  • სამწუხაროდ, ჩვენი დიალოგი COVID-19-სა და მსოფლიო პანდემიას დაემთხვა. შეგიძლია გაუზიარო ჩემს მკითხველს როგორია შენთვის ეს პერიოდი?

ნამდვილად ძალიან უცნაურია ცხოვრობდე ნიუ იორკში, მსოფლიოს ერთ-ერთ ყველაზე საქმიან ქალაქში და სირენების გარდა არაფრის ხმა გესმოდეს. იზოლაციის დახმარებით გადავაფასე ჩემი პრიორიტეტები როგორც პირად, ისევე კარიერულ ცხოვრებაში. დიდი იმედი მაქვს, რომ ხალხს მოსწონს ჩემი ინსტაგრამ-ლაივები, IGTV ვიდეოები და ის მასალა, რომელსაც ეს პერიოდი ვქმნი. ამ ყველაფერს საფუძვლადი ჩემი ცნობისმოყვარეობა და თანადგომის სურვილი უდევს.

იოგა ძალიან მნიშვნელოვანი გახდა ჩემთვის ამ პერიოდში. ყოველდღიურად ვვარჯიშობ და ვცდილობ სისტემატიურად გავაკეთო მედიტაციები. ამასთანავე, ჩემი რუტინის შენელება, ნაკლები დროის გატარება ტელეფონის ეკრანთან და მეტი დრო საკითხავად ძალიან დადებითად აისახა ჩემზე.

  • შენმა გამომწერებმა კარგად იციან, რომ მოდური ტრენდების გარდა შენ ისეთ თემებსაც ეხები, როგორებიცაა ეკოლოგია და ეთიკური მოდა. როგორ შეაფასებ ბრენდების მიდგომას იმ გამოწვევებზე, რომლის წინაშეც დგას პლანეტა?

სიმართლე, რომ გითხრა, ვცდილობ მეტი ოპტიმიზმით ვიფიქრო ამ საკითხზე, თუმცა ზომიერება და მოდა იდეოლოგიურად საკმაოდ მოშორებულია ერთმანეთისგან. მოდის ბრენდის მიზანია შექმნას ახალი კოლექციები, მუდმივად აწარმოოს ახალი სამოსი. მე მიყვარს მოდა, აქტიურად ვარ ამ სფეროში ჩართული, თუმცა ამ ყველაფრის გააზრება ნამდვილად თავს მატკიებს.

იმედი მაქვს, რომ გლობალური პანდემიის დასრულებასთან ერთად მივაგნებთ გამოსავალი და მოდის ბიზნესის კეთების გაუმჯობესებულ გზებს.

  • როგორც მოდის ინფლუენსერს შენ ალბათ ძალიან დიდი გარდერობი გაქვს. როგორ ახერხებ, შენი გარდერობის გონივრული მოცულობის შენარჩუნებას?

პირველ რიგში, ყოველთვის ვცდილობ არ მივიღო საჩუქრები ბრენდებთან თანამშრომლობის დროს. ამის ნაცვლად, მირჩევნია მათხოვონ ის ერთეულები, რომელიც უნდა გადავიღო და შემდეგ უკან დავაბრუნო. ხანდახან ისეც ხდება, რომ მიგზავნიან საჩუქრებს და როგორც წესი, ამ საჩუქრების უმრავლესობას სხვებს ვჩუქნი. კარიერის დასაწყისში ძალიან შეზღუდული შესაძლებლობები მქონდა და ვიცი რამდენს ნიშნავს ასეთ დროს ნივთის საჩუქრად მიღება. შესაბამისად ვცდილობ გავცე იმდენი, რამდენიც შემიძლია.

  • რა აზრის ხარ ვინტაჟსა და მეორად შოპინგზე?

პირადად მე ვაგროვებ ძველ Celine-ის ნივთებს, Phoebe Philo-ს პერიოდიდან. მათ, როგორც წესი Vestaire-ზე ან The Real Real-ზე ვპოულობ. ასევე, მიყვარს ევროპის ვინტაჟური მაღაზიები, მგონია, რომ არჩევანი და ხარისხი იქ ბევრად უკეთესია (ვიდრე ამერიკაში). ჩემი ერთ-ერთი უსაყვარლესი ადგილი და მაღაზია კოპენჰაგენში მდებარეობს და ეს Paloma’s Vintage-ია.

  • არის რაიმე ნივთი ან look-ი, რომელსაც სოციალური ცხოვრების აღდგენისთანავე მოირგებ?

ჰმმ.. ალბათ ის Celine-ის ნივთი, რომელსაც განსაკუთრებული შემთხვევისთვის ვინახავ. ნამდვილად საზეიმოდ მინდა ავღნიშნო ამ ყველაფრის დასრულება.

  • შეგიძლია გაგვიზიარო 3 გვერდი, რომელიც შენ შთაგაგონებ?

პირველ რიგში ჩემი მეგობარი და მენტორი @therealphilliplim (ფოლიპი მოდის დიზაინერია, თუმცა მას საუკეთესო კულინარიური Story-ები აქვს და მისი ყოველდღიურობა შთამაგონებელია, როგორც თვითონ ის).
ასევე, საჭმლის სტილისტი @lailacooks (მომწონს ლეილას მიდგომა საკვებისადმი. ის კრეატიულ, ხალისიან და საგანმანათლებლო პოსტებითაა ცნობილი.)
და ბოლოს, ჩემი სახის კოსმეტოლოგი @joannaczechofficial (ჯოანა ერთ-ერთი ყველაზე მხიარული ადამიანია; ასევე 20 წელზე მეტია რაც ამ სფეროში მუშაობს და ძალიან სასარგებლო ხრიკებს აზიარებს)

  • გარდა შენი ინსტაგრამ აქტივობებისა, რომელსაც ყოველდღიურად გვიზიარებ, არის კიდევ რაიმე პროექტი, როემლზეც მუშაობ და შეგიძლია გაგვიზიარო?

დიახ! დაელოდეთ VanessaWantsToKnow ახალ ყოველკვირეულ პოდქასთებს. გპირდებით ბევრ მხიარულებას და მამოტივირებელ საუბრებს კრეატიულ ადამიანებთან. ნამდვილად მოსასმენია!

English version available here

მოდის ინდუსტრიის მომავალი

ჩვენებაზე ყველა სტუმარი შეძახილების და დაცვის თანხლებით მოვხვდით. შესვლისას მეხსიერებაში ამომიტივტივდა სცენა ფილმიდან “სექსი დიდ ქალაქში”

რამდენიმე წლის წინ ლონდონში მოდის კვირეულს დავესწარი. ერთ-ერთ ჩვენებაზე მისულს შესასვლელი ცხოველთა დამცველების მიერ ბლოკირებული დამხვდა. ტრანსპარანტების გარდა აქტივისტებს პლანშეტებიც ეჭირათ, რომლებზეც ცხოველების წამების კადრები ტრიალებდა. ჩვენებაზე ყველა სტუმარი შეძახილების და დაცვის თანხლებით მოვხვდით. შესვლისას მეხსიერებაში ამომიტივტივდა სცენა ფილმიდან “სექსი დიდ ქალაქში”, რომელშიც ჩვენებიდან გამოსულ სამანტას ცხოველთა დამცველი აქტივისტი თეთრ ქურქზე წითელ საღებავს ასხამს. თავი დაცულად ვიგრძენი, რადგან ქურქის მსგავსი არაფერი მეცვა. თუმცა, პირველად გავაცნობიერე, რომ რეალურ ცხოვრებაშიც არსებობს საკითხი, რომელიც მოდის ეთიკურ, ეკოლოგიურ და გონივრულ ცვლილებებს საჭიროებს.

საქმე იმაშია, რომ ინდუსტრია, რომელიც მთელს მსოფლიოში მილიონობით სამუშაო ადგილს ქმნის, ასევე წამყვან ადგილს იკავებს ჩვენი პლანეტის დაბინძურების მიმართულებითაც. მაგალითად, ყოველწიურად მთელი ტექსტილის 85% ნაგავსაყრელებზე ხვდება, რომლის ნელი ხრწნა ყოველდღიურად აბინძურებს ჰაერსა და წყალს ქიმიკატებით.
უკანასკნელი წლების განმავლობაში ამ საკითხზე უფრო აქტიურად და ღიად დაიწყეს მსჯელობა. ამჯერად თემის ინიციატორი არა აქტივისტთა ჯგუფი, არამედ თვითონ მოდის ინდუსტრიაა. ვეგანური ტყავი, ეკო-მეგობრული შეფუთვები და მდგრადი წარმოება იმ ცვლილებების მხოლოდ მცირე ნაწილია, რომელსაც არსებული ბრენდები განახორციელებენ. მსგავსი მიდგომები ახალი ბრენდებისთვის თავის დამკვიდრების საუკეთესო საშუალებად იქცა და, ბუნებრივია, მოდის ინფლუენსერებმაც არ დააყოვნეს.

Xenia Adonts მოდის პოპულარული ინფლუენსერია, რომელმაც 2019-ში მსოფლიოს საკუთარი ხაზი წარუდგინა. მან ბრენდ Attire-ის შექმნის უმნიშვნელოვანეს მოტივად იმ პრობლემების გააზრება დაასახელა, რომლებიც ამ ინდუსტრიას ახლავს თან. შედეგად, შეიქმნა სრულად მდგრადი ბრენდი, რომელიც ხარისხიან, “timeless” სამოსს აწარმოებს.
კიდევ ერთი ინფლუენსერი, რომელმაც ამ თემაზე ღიად დაიწყო საუბარი არის Vanessa Hong. ის ცნობილია დახვეწილი, მინიმალისტური სტილითა და ჯანსაღი ცხოვრების წესით. გასაკვირი არ იყო, რომ ზამთარში მოდის კვირეულის პერიოდში მან გამოაქვეყნა ვიდეო, რომელშიც თავის  გამომწერებს იმ წინააღმდეგობებს უზიარებს, რომელიც ერთის მხრივ მის საყვარელი საქმეს, ხოლო მეორეს მხრივ ეკო-მეგობრული ცხოვრების წესს შორის წარმოიქმნება. ვანესას ყოველდღიური საქმიანობა ტრენდებისა და ახალი მოდელების გაზიარებაა, რითიც გამომწერებს მუდმივად ახალი პროდუქტების შესაძენად მოუწოდებს. ინფლუენსერების ასეთი გავლენა კი წარმოების დაჩქარებას იწვევს, რაც ხშირ შემთხვევაში ხარისხისა და ეკოლოგიის ხარჯზე ხდება.

მოდის განვითარების ტემპსა და მომავალზე სულ რამდენიმე კვირის წინ Vogue-ის Zoom კონფერენციაზეც ისაუბრეს. გაუქმებული მოდის კვირეულებისა და შეწყვეტილი წარმოების პერიოდში, ინდუსტრიის ლიდერები თანხმდებიან, რომ პანდემიის შემდეგ ინდუსტრიაში ახალი სტანდარტები დაწესდება. Anna Wintour-ის თქმით, შეუძლებელი გახდა მოდის ადეკვატური აღქმა ახალი ტრენდებისა და კოლექციების შექმნის სიხშირის გამო; ხოლო Virgil Abloh ერთადერთ გამოსავალს იმ ეთიკურ მიზნებში ხედავს, რომელსაც ყველა ბრენდი უნდა ემსახურებოდეს.

ჩემი აზრით, გამოსავალი ჯაჭვის ყველა რგოლში მოიძებნება. შესაბამისად მნიშვნელოვანია, არ დაგვავიწყდეს ჩვენი, როგორც მომხმარებლების, ცნობიერებისა და პასუხისმგებლობის გაზრდა.

ამის გაკეთება უამრავი გზით შეიძლება:

·      საბაზისო კაპსულა-გარდერობის შექმნა*
საბაზისო გარდერობი იმ მცირერიცხოვანი ნივთების ნაკრებია, რომლებიც მარტივად ეხამება ერთმანეთს და ერგება კონკრეტული ადამიანის ცხოვრების წესს. ასეთი გარდერობი საშუალებას იძლევა ინვესტირება ხარისხიან ნივთებში ჩავდოთ და მარტივად მოვარგოთ ჩვენს გარდერობს ტრენდული ნივთებიც.

·      ხარისხიანი სამოსის შეძენა, რომელიც არაერთ სეზონს გასტანს*
თუკი ქაოტურად არ შევიძენთ ნივთებს და ვეცდებით, რომ გარდერობის გონივრული მოცულობა შევინარჩუნოთ, შევძლებთ რამდენიმე იაფფასიანის ნაცვლად ერთი ღირებული ნივთი შევიძინოთ, რომელიც ნაგავსაყრელზე დიდხანს არ აღმოჩნდება.

·      არასასურველი სამოსის გადამუშავება*
ბუნებრივია, ტანსაცმელი, მისი ხარისხის მიუხედავად შეიძლება მოგვბეზრდეს. ნაცვლად იმისა, რომ ეს ნივთები გადავყაროთ, შეგვიძლია მათი გაჩუქება, მეორად საიტებზე გაყიდვა, ან ჩაბარება გადასამუშავებლად. ამ გზით დამატებით შემოსავალსაც მივიღებთ და ძველ ნივთებს ახალ სიცოცხლეს ვაჩუქებთ.

·      ვინტაჟი*
თუ შევიძენთ იმას, რაც უკვე არსებობს, ჩვენ გავუფრთხილდებით ბუნებრივ რესურსებს, რომელიც ყოველი ახალი ნივთის შექმნაზე იხარჯება. ამასთანავე ისეთ უნიკალურ ნივთებს აღმოაჩენთ, რომლებიც სასიამოვნოდ გაგაოცებენ.

იანვარში, კოპენჰაგენის მოდის კვირეულის ორგანიზატორებმა დააანონსეს ახალი სტანდარტი კვირეულის მონაწილეებისთვის. იმისათვის, რომ ბრენდმა მოიპოვოს მოდის კვირეულზე მონაწილეობის უფლება ის უნდა აკმაყოფილებდეს მდგრადი წარმოების 17 კრიტერიუმს. შედეგად კოპენჰაგენი პირველი ქალაქია, რომელიც სრულად მდგრად მოდის კვირეულს მასპინძლობს. ამ მაგალითმა პოზიტიური რეაქცია გამოიწვია მოდის სხვა დედაქალაქებიდან და ფაქტია, რომ ინდუსტრია მზად არის ცვლილებებისთვის.

ამ თემაზე დაუსრულებლად შეიძლება მსჯელობა. იმედი მაქვს მომავალში ბევრ პოზიტიურ ცვლილებას ვიხილავთ. ჩვენ კი ამ თემას აქ კიდევ არაერთხელ შევეხებით.



* ამ თემას უფრო ვრცლად მომავალ სტატიაში იხილავთ